Allir nemendur geta lært og allir nemendur eiga rétt á því að taka framförum. Til þess að mæta auknum kröfum um flóknara og fjölbreyttara nám nemenda þurfa að vera breyttar kröfur til kennara og þess starfs sem unnið er í skólum. Krafan verður sífellt háværari um að nemendur búi yfir ákveðinni hæfni til þess að geta fótað sig í sífellt breytilegum heimi. Leiðsagnarnám inniheldur margt sem verið er að nota í skólanum okkar og einnig margt sem hægt var að bæta við til að gera gott skólastarf enn betra. Verkefnið er mikilvægt þar sem markmiðið var að bæta faglega þekkingu kennara, nýta markvisst fjölbreytta kennsluhætti , auka vellíðan og búa til jákvæð áhrif á nám nemenda. Áherslan var á að breyta menningu skólans á jákvæðan hátt. Við ætlum að fjalla um þá breytingu sem við sjáum að hefur átt sér stað í kennslustofunni og á skólabrag eftir að við fórum að nota aðferðir leiðsagnarnáms markvisst með nemendum.