Արուեստագէտ Գոհար Սարգսեան՝ Ազգային Գրադարանին հետ միասին, բոլոր փափաքողները կը հրաւիրէ մասնակցելու «Բանաստեղծական երկխօսութիւն» նախագիծին:

Նախագիծը նպատակ ունի ժամանակակից արուեստի մեթոտներով հանդիսատեսին ներկայացնել արեւմտահայերէնի երգեցիկ եւ բանաստեղծական կողմերը, յառաջացնել հետաքրքրութիւն արեւմտահայերէնի նկատմամբ, երկխօսութիւն ստեղծել արեւմտահայ բանաստեղծներու եւ հանդիսատեսին միջեւ եւ հարթակ մը ստեղծել նոր բանաստեղծներու յայտնագործման համար՝ արեւմտահայերէնը ընտրելով որպէս հիմնական գործիք։

Կոչը բոլոր անոնց համար է, ովքեր կը սիրեն հայերէն գրել եւ ստեղծագործել։ Փափաքողները պէտք է ընտրեն ստորեւ նշուած արեւմտահայ բանաստեղծներու ցանկէն որեւէ բանաստեղծութեան քառեակ եւ շարունակեն արեւմտահայերէնով: Ստեղծագործութիւնները կը գնահատուին իրենց բանաստեղծականութեան համար, ուստի կը խրախուսենք չվախնալ քերականական սխալներէ եւ փորձել մտքին ազատութիւն տալ՝ արթնցնելով ներքին բանաստեղծական ոգին:

Կոչի աւարտէն ետք, դատակազմը, կազմուած ոլորտի մասնագէտներէ, կ’ընտրէ եօթը նոր ստեղծագործութիւն՝ մէկական իւրաքանչիւր բանաստեղծէ։ Այնուհետեւ, ասմունքողներու օգնութեամբ պիտի ձայնագրուին ընտրուած բանաստեղծութիւններուն ձայնային տարբերակները, որմէ ետք արդէն ձայնագրուած տարբերակները պիտի տեղադրուին Գոհար Սարգսեանի հեղինակային ինսթալասիոնի խցիկին մէջ , որ կը կոչուի «Արեւմտահայ բանաստեղծական խցիկ», որ կարելի պիտի ըլլայ ունկնդրել ականջակալներով:

«Արեւմտահայ բանաստեղծական խցիկ» ինսթալասիոնը բաց կ’ըլլայ հանրութեան Գոհար Սարգսեանի անհատական ցուցահանդէսէն ետք, որ կը նախատեսուի 2024-ի գարնան, Հայաստանի Ազգային գրադարանին մէջ։

Կը խնդրուի բանաստեղծութիւնները westernpoetrypost@gmail.com հասցէին ղրկել մինչեւ Դեկտեմբեր 30՝ նշելով ձեր անուն-մականունը:

Նախագիծը կը կոչուի «Արեւմտահայ բանաստեղծներու վերադարձը»։ Ան կ’ընդգրկէ բազմամիջոց (multimedia), միջգործօն արուեստի (interactive art) ինսթալասիոն` բաղկացած ձայնային եւ տեսողական ինսթալասիոններէ, եւ գրութեան հիմամբ գծանկարներ , եւ նախագծի աւարտին որպէս անհատական ցուցահանդէս պիտի ցուցադրուի Հայաստանի Ազգային գրադարանին մէջ։

Նախագիծը կ’իրականացուի Գալուստ Կիւլպէնկեան Հիմնարկութեան օժանդակութեամբ ։

Կարօ Արմենեան

Մշոյ հող դուն ցնծա

անհանգիստ խորքերէդ

ցուլերուդ դոփիւնէն

երկիրն այս կը դողայ

…

Վահան Զանոյեան

Տեսա՞ծ ես դուն

այգաբացը

Հայաստանի լեռներուն մեջ

Նշմարա՞ծ ես ինչպէս յանկարծ

արշալոյսի առաջին սուր շողերուն հետ

լեռնաշխարհը

իր ձորերով, գագաթներով ու դաշտերով

ուշքի կու գայ

եւ դուն յանկարծ կ’անդրադառնաս

թէ մինչ պահն այդ

քու՜ աչքերովդ չէիր տեսած

կյանքի շարժը

ոչ ալ զգացած

արիւնիդ մեջ

իր իսկական, ֆիզիկական գոյութիւնը․․․

Յարութիւն Պէրպէրեան

Քեզ միշտ փնտռած եմ

տարբեր դէմքերու, տարբեր աչքերու

պաստառին վրայ,

եւ քեզ գտած ու կորսնցուցած եմ

յոյզով անխռով:

Քեզ միշտ երգած եմ

տարբեր ձեւերով

Ա՛յլ անուններով:

Կրակ ես

կեանք ես,

խռովք, հրաշք ես

եւ տառապանք ես,

․․․

Հայկանուշ Մառք

Ինչպէ՞ս սիրեմ զքեզ, սիրելիս

Որ սէրս ըլլայ միշտ տեւական ու տարբեր,

Ինչպէ՞ս սիրեմ զքեզ, իմ հոգիս,

Ոը նմանը չըրած ըլլան ուրիշներ․․․

․․․

Անանուն (հատուած)

Միսաք Մեծարենց

Վայրի՜ ծաղիկ, անունդ ի՞նչ է.

Ըսէ՛, մասուր ու կանանչէ՛

Ցանկապատին շուքին նստած

Վայրի՜ ծաղիկ, անունդ ի՞նչ է։

Հերանուշ Արշակեան

Երկինքը կապոյտ է. աչքերն ալ սիրուն,

Մեզի կը նային կապոյտով անհուն.

Կապոյտ են բոլոր իրերը անուշ,

Ծովերը անհուն, ծաղիկներ քնքուշ,

Ամպերը աննիւթ, հոգին լուսեղէն,

Երբոր դուրս կ’ելլէ իր պահարանէն:

Վեհանոյշ Թեքեան

Մղձաւանջ է դար կը տեւէ պէ՛տք է տեղ մը իմաստ գտնէ

Ոչ սփոփանք ոչ ափսոսանք

Միմիայն Յոյսը կ’ապրի

Ինչ ալ ըլլայ գեղափունջը յոյսի

Ծաղկամանին մէջ կ՚ապրի

Թարմ ջուրով ու առանց մահու

Ի՞նչ է գաղտնիքը չթառամելու

Գաղտնիքն ի՞նչ է

Թէ՛ իմաստուն թէ՛ գոհունակ ապրելու

Թէ՛ լիացած թէ՛ հաշտուած մեռնելու

…