Þemu by Helgi Reyr

reyrhelgi — 2024-05-21 08:44:20 UTC

Í bókinni fáum við lýsingu á Reykjavík í kringum árið 1980. Sagt er frá ýmsum stöðum í borginni sem í dag eru gjörbreyttir en líka menningu, viðhorfum, tónlist og tísku á þessum tíma. Skoðið þessa staði, sýnið þá og segið frá þeim. Veltið fyrir ykkur menningunni á þessum tíma, viðhorfum fólks, hegðun og framkomu. Sýnið og segið frá því hvað hefur breyst og hvernig. Eru þessar breytingar allar til góðs?

reyrhelgi — 2024-05-21 08:44:37 UTC

Í Sjóræningjanum lýsir Jón Gnarr hrottalegu einelti sem hann verður fyrir af hálfu unglinga í nærumhverfi sínu; m.a. í skólanum og félagsmiðstöðinni. Segðu frá því hvernig þetta einelti lýsir sér og hvernig Jón brást við því. Lýstu því hvernig hann reyndi að leysa vandann og hvernig hann fann frið fyrir eineltinu. Hugleiddu hvernig þessir hlutir væru í dag og hvernig mögulega væri tekið á svona málum.

reyrhelgi — 2024-05-21 08:44:52 UTC

Í bókinni segir frá samskiptum Jóns við margt fullorðið fólk. Flest þetta fólk á það sameiginlegt að Jóni finnst það skrýtið, honum finnst það líta niður til sín og ekki vilja leyfa honum að vera eins og hann er, með einhverjum undantekningum þó. Fjallaðu um helstu fullorðnu einstaklingana í lífi Jóns og gerðu grein fyrir því hvað einkennir samskipti þeirra.

reyrhelgi — 2024-05-21 08:45:11 UTC

Tónlist leikur stórt hlutverk í Sjóræningjanum og í lífi Jóns á þeim tíma sem sagan gerist. Kafið ofan í tónlistina á þeim tíma sem sagan gerist, kynnið ykkur og okkur hljómsveitir sem sagt er frá, fræðist um tónlistarstíla og -stefnur sem voru vinsæl og togstreitu sem var milli ólíkra hópa.

reyrhelgi — 2024-05-21 08:45:29 UTC

Jón upplifir sig utangarðs í samfélaginu. Honum finnst enginn skilja sig og enginn leyfa sér að vera eins og hann er. Hann fær nóg af “kerfinu” og finnur sig í pönkinu. Fjallaðu um pönkarann Jón Gnarr, sýn hans á kerfið, skólann og samfélagið allt.