Ihambing na lamang natin ito sa katagang, “Man is not made for defeat. A man can be destroyed but not defeated.” Maari mang tayo ay mabigo, masaktan at dumaan sa isang pagsubok sa buhay subalit sa kahit anong paraan nito ay hindi tayo natalo. Hindi man natin nakamtan ang kalalabasan na tutugma sa ating pamantayan at mithiin, tayo naman ay may natutunan sa kabila ng lahat ng ito.

Ang bawat kabiguan sa ating buhay ay tila isang paraan upang makarating tayo sa mas higit at dapat nating makamit. Ang pagtanggap natin sa mga pagsubok at kabiguang ito ay ang siyang magtatawid sa atin sa landas na hindi arok ng ating mga isipan, sa mga bagay na hindi mo aakalaing makakamit at mapapasayo, mga bagay na hindi mo pinangarap. Ani nga nila ay “blessing in disguise”. Tayong mga tao ay parang isang espada na patuloy na pinupukpok at sumasailalim sa init ng apoy hanggang sa maging isang magandang klase na walang kasing tibay at ganda.

Ang pagsubok ay parte ng ating buhay. Ang mga ito lamang ang siyang magpaparamdam sa atin ng kahalagahan ng mga panahong tayo ay nasa kaligayahan. Ani nga ni Heraclitus, “Both good and bad have their inevitable place in the order of things.” Mapapahalagahan lamang natin ang ganda at sarap ng buhay kung mararanasan natin ang hirap din nito.

At ang pagsubok ay isang bagay na dumadaan lamang sa ating buhay. Darating ang panahon na mare-realize mo na nalampasan mo na ang isang bagay at walang makakatapat ng saya mo. At magiging ‘proud’ ka sa sarili mo dahil ang isang bagay na akala mo’y hindi mo kakayanin ay nalampasan mo, at ngayon ay dala-dala mo sa araw-araw na buhay ang aral na iniwan sayo nito.

Sisimulan ko ang aking sagot sa tanong na “ano nga ba ang mga pagsubok na ito?” sa isang sipi ni Joshua J. Marine. Ayon sa kanya, “Challenges are what make life interesting; overcoming them is what makes life meaningful.” Ako ay naniniwala na hindi buo ang buhay kung walang mga pagsubok. Anong makabuluhan sa buhay kung walang mga bagay na sumusubok sa atin? Paano ito magiging kawili-wili kung ang lahat ng mga bagay ay naaabot natin nang madali at walang kahirap-hirap? Ang ating buhay ay isang kuwento at tayo ang bida. Ang mga pagsubok ang dahilan kung bakit mayroong daloy ng pangyayari o plot ang ating buhay. At sa huli, tulad ng pagbabasa ng isang kuwento, tayo ay mayroong matututuhan mula sa mga ito. Sa tingin natin ay tila sinisira ng mga ito ang ating buhay, ngunit kabaliktaran nito ang nangyayari. Ang mga pagsubok ang siyang bumubuo at humuhubog ng ating sarili at pagkatao. Ang mga pagsubok ay naririyan upang turuan tayo ng mga leksyon. Sila ay patuloy na dumadating sa ating buhay upang palakasin tayo sa mga aspetong tayo ay mahina. Ang dapat nating maging tugon ay patuloy na lumaban. “Life goes on,” ayon sa kanta ng Koreanong banda na BTS. At panghuli, lagi nating tatandaan na ang mga pagsubok ay naririyan din upang mahanap natin at makilala pa ang ating sarili. Ito ay isang paraan upang ma-diskubre pa natin ang mga bagay na natatago sa ating sarili. Dapat ay patuloy lamang tayo sa paglaban, sa pag-explore, at pag-diskubre, dahil ang mga ito ang bubuo sa ating kuwento, sa ating pakikipagsapalaran sa mundo.