· სასქესო ჰორმონების რეგულირება

მიტოქონდრია მოთავსებულია უჯრედის ჟელესმაგვარ ნივთიერება -ციტოზოლში. ისინი ოვალური ფორმის ორმემბრანიანი ორგანოიდები არიან - გარე მემბრანა აკრავს მთელ ორგანელას, ხოლო შიდა მემბრანა დანაოჭებულია და ქმნის კრისტებს. კრისტებს შორის სივრცე თხევადი ნივთიერებით -მიტოქონდრიული მატრიქსითაა ამოვსებული. მატრიქსში მოთავსებულია დნმ, რიბოსომები და ის ფერმენტები, რომლებიც ორგანულ ნივთიერებებს ჟანგავენ ენერგიის წარმოსაქმნელად.

ასეთი აგებულება, როგორც აღმოჩნდა, ძალიან ხელსაყრელია უჯრედული სუნთქვისთვის, რადგან იგი საშუალებას იძლევა, რეაქციები განცალკევებით წარიმართოს და სხვადასხვა „სივრცეში" მოლეკულების განსხვავებული კონცენტრაცია დაგროვდეს. მიტოქონდრიები გვხვდება ადამიანის უჯრედების უმრავლესობაში (ისევე, როგორც მცენარეთა და ცხოველთა უჯრედების უმეტესობაში), მაგრამ მათი რიცხვი განსხვავდება იმის მიხედვით, თუ რა ფუნქცია აკისრია უჯრედს და რამდენი ენერგია ესაჭიროება მას. რაც უფრო მეტი ენერგიაა საჭირო, მით უფრო მეტი მიტოქონდრია დასჭირდება უჯრედს. განსაკუთრებით ბევრია იმ უჯრედებში, რომლებიც ბევრ ენერგიას მოიხმარენ: ღვიძლი, გული, თავის ტვინი, კუნთები, პანკრეასი, თვალი, ყური, თურკმელები, კუჭნაწლავის ტრაქტი.
მიტოქონდრიული დაავადებები თანდაყოლილი ქრონიკული დაავადებებია, რომლებიც შესაძლოა გამოვლინდეს დაბადებისას ან მოგვიანებით, ნებისმიერ ასაკში.

მიტოქონდრიული დაავადებები შესაძლოა გამოიხატოს ფიზიკური, კოგნიტიური, განვითარების დარღვევებით და ისეთი სიმპტომებით, როგორიცაა წონის დეფიციტი, სისუსტე, ადვილად დაღლა, კუნთების კოორდინაციის დარღვევა, კუნთების სისუსტე, ტკივილი, გულყრები, მხედველობის და/ან სმენის დაქვეითება ან დაკარგვა, კუჭნაწლავის პრობლემები, გონებრივი განვითარების შეფერხება და სწავლის პრობლემები, დემენცია, რესპირატორული გამოვლინებები, დიაბეტი, ინფექციებისადმი გაზრდილი რისკი, სხვადასხვა ორგანოს უკმარისობა.