Í þessari málstofu kynna kennarar Víkurskóla Uglurnar, sem skipulagðar eru með tvennum hætti; annars vegar í íslensku, náttúrufræði, samfélagsfræði og upplýsinga- og tæknimennt og hins vegar í ensku, íslensku, samfélagsfræði og upplýsinga- og tæknimennt. Uglurnar eru skipulagðar af ugluteymum og mikil áhersla á fjölbreytt verkefni og þau samtvinnuð og metin út frá hæfniviðmiðum allra námsgreinanna. Samvinna nemenda er mikil og er aðferðum leiðsagnarnáms beitt og lögð áhersla á skapandi skil.

Höfundar Regnbogans eru Edda, Fiona og Hildur og tóku þær við verðlaunum á Öskudagsráðstefnunni.

Hildur Seljan er með B.A. í ensku og kennsluréttindi í framhalds- og grunnskóla. Hildur er að austan en hefur einnig búið lengi á Suðurlandi og í Reykjavík. Hún býr nú í Reykjavík ásamt eiginmanni, tveimur börnum og læðunni Lunu sem stjórnar heimilinu. Hún hefur aðallega fengist við enskukennslu, bæði í framhalds- og grunnskóla, en með tímanum hafa fleiri og fleiri námsgreinar bæst við og nú er hún búin að kenna allar skyldugreinar grunnskólans nema stærðfræði. Hildur hefur kennt víða, m.a. í Menntaskólanum á Egilsstöðum, Menntaskólanum í Kópavogi, Sæmundarskóla og Kársnesskóla. Starfsárin við kennslu eru nú að verða tólf. Hildur tók þátt í að móta nýtt skólakerfi í Menntaskólanum á Egilsstöðum sem kallast spannakerfi og bjó til, ásamt samkennara, fyrstu áfangalýsingarnar í ensku sem notaðar voru sem grunnur um land allt í framhaldsskólum. Hildur hefur einnig tekið að sér enskukennslu á áfangaheimilinu Krýsuvík í gegnum MK og fannst henni það gjöfult og skemmtilegt verkefni. Hún byrjaði sem kennari við Víkurskóla haustið 2021 og fór strax inn í uglurnar en einnig hefur hún tekið að sér að leiða kynfræðslu í Víkurskóla og er komin á fullt skrið í Erasmus+ verkefnum skólans. Hildi finnst uglur gefa sér endalaus tækifæri til sköpunar og frelsis og líður alveg eins og Fionu; í réttum teymum er allt hægt og allt skemmtilegt! Hildur er í leiðtogahlutverki í uglum.

Fyrsta verkefnið var í samstarfi við Súsönnu Margréti Gestsdóttur, lektor við Menntavísindasvið Háskóla Íslands. Þar tókum við átta nemendur með okkur til að kynna samþættinguna okkar Uglur fyrir kennaranemenum. Eftir að við höfðum haldið smá tölu fóru kennaranemar að útbúa sína eigin uglu með aðstoð sérfræðinganna okkar nemendanna. Reynslan og upplifunin skilaði á allan hátt góðum árangri.

Við í Víkurskóla tökum síðan oft við heimsóknum úr öðrum skólum og eftir að krakkarnir höfðu sýnt og sannað að þau höfðu svo mikið fram að færa fórum við í að þjálfa tvo hópa af nemendum í 10. bekk til útskýra og segja frá leiðsagnarnámi í gegnum Uglur. Það má með sanni segja að þessi aðferð virkar vel og ætlum við því að halda því áfram.