Skessuhorn, 2017).

Hins vegar er það starfsendurhæfingarhlutinn sem er veigamesti partur þjónustunnar.  StarfVest  starfar með Vinnumálastofnun og er í samstarfi með VIRK starfsendurhæfingu. Nánar verður fjallað um það samstarf hér á eftir.

Markmið starfseminnar í heild er að auka lífsgæði, rjúfa félagslega einangrun, veita stuðning við að ná markmiðum, auka persónulega- og samfélagslega virkni og færni, hvetja fólk í nám eða að aðstoða það aftur á vinnumarkaðinn í viðeigandi starfshlutfalli.

Þjónustan er í formi fræðslu og fyrirlestra sem fagfólk innanhúss heldur eða að keyptir fyrirlesarar, margskonar hreyfing í boði, með eða án stuðnings. Auk þess er ýmiskonar hópefli og skemmtanir með það að markmiði að æfa fólk í samskiptum og félagsfærni. 

Þar sem þjónusta HVER er kerfislega tvískipt verður farið nánar út í það hér til hliðar.

Markmið laganna er að tryggja einstaklingum með skerta starfsgetu, eftir slys eða veikindi, atvinnutengda starfsendurhæfingu. Það er einnig tekið fram í lögunum að starfsendurhæfingasjóðir og stofnanir á vegum ríkis og sveitafélaga starfi saman eins og hægt er og myndi heildstætt kerfi endurhæfingar.

Einnig fellur hluti þjónustunnar undir lög nr. 55/2006 - um vinnumarkaðsaðgerðir. Markmið þeirra laga er að veita einstaklingum viðeigandi aðstoð til að verða virkir þátttakendur á vinnumarkaði.  Auk þess er þeim  ætlað að stuðla að jafnvægi milli framboðs og eftirspurnar eftir vinnuafli í landinu. 

Miðað er við að einstaklingur sé með vottaðan heilsubrest frá lækni þegar hann kemur til ráðgjafa VIRK og ráðgjafar starfa alltaf í samráði við lækni. Skilyrði fyrir aðstoð hjá VIRK eru þau að markmið einstaklings sé að verða aftur virkur þátttakandi á vinnumarkaði, eða auka þátttöku á vinnumarkaði svo fljótt sem verða má. Einnig skiptir það veigamiklu máli að viðkomandi geti ekki sinnt starfi sínu að hluta eða öllu leyti eða tekið þátt á vinnumarkaði vegna hindrana af völdum heilsubrests sem rekja má til veikinda eða slysa. Þá er um að ræða fjarvistir frá vinnu í lengri tíma vegna heilsubrests af andlegum eða líkamlegum toga. 

Markmið atvinnutengdrar starfsendurhæfingar er að auka þátttöku á vinnumarkaði eftir að hafa búið við skerta starfsgetu vegna heilsubrests í kjölfar veikinda eða slysa (Virk, e.d.).

Í lögum um atvinnutengda starfsendurhæfingu og starfsemi starfsendurhæfingarsjóða  

(nr. 60/2012) er fjallað um skilyrði fyrir þjónustu starfsendurhæfingarsjóðs: Skilyrði fyrir þjónustu starfsendurhæfingarsjóðs er að einstaklingur búi við heilsubrest sem hindrar fulla þátttöku hans á vinnumarkaði og að hann stefni að endurkomu á vinnumarkað eða að auka þátttöku á vinnumarkaði svo fljótt sem verða má. Enn fremur er það skilyrði að einstaklingurinn hafi þörf fyrir þjónustuna, hún sé til þess fallin að auðvelda honum að fara aftur til vinnu og líkleg til árangurs á þeim tíma sem hún er veitt. Þá er það skilyrði að einstaklingurinn hafi vilja og getu til að taka markvissan þátt í atvinnutengdri starfsendurhæfingu og fylgja þeirri áætlun sem þar er sett fram. Á Vesturlandi eru tveir ráðgjafar frá VIRK, einn á Akranesi og einn í Borgarnesi, sem vinna í samstarfi við lækna, aðra fagaðila og stofnanir eftir þörfum. Þessar stofnanir eru t.d. HVER, Starfsendurhæfing Vesturlands og Vinnumálastofnun.
(Virk, e.d.)

Þar sem þetta er eina slíka þjónustan í boði á Vesturlandi þá ber VIRK að fjármagna hana skv. lögum um atvinnutengda starfsendurhæfingu og starfsemi starfsendurhæfingarsjóða (nr. 60/2012).

Fólk í leit að vinnu með skerta starfsgetu vegna andlegra eða líkamlega skerðinga sækir sér einnig þjónustu HVER í gegnum Vinnumálastofnun. Þá er unnið að því að finna starfshlutfall sem hentar einstaklingum ásamt því að finna vinnustað við hæfi. Í tengslum við það þá fer samstarf HVER og Vinnumálastofnunar fram í formi vinnuprófana. Þá er unnið náið með vinnustöðum og stofnunum í nærumhverfi fólks. Fólk fer á tímabundna vinnusamninga þar sem það fær að prófa sig áfram í starfi og starfshlutfalli innan vinnustaða. Vinnuveitandi veit af skerðingu einstaklingsins og Vinnumálastofnun borga hluta af launum. Við fengum að heyra það frá yfirmanni Vinnumálastofnunar Vesturlands og forstöðukonu HVER að það hefur sýnt sig að gerð vinnusamninga opna margar leiðir á vinnumarkaðnum. Bæði fyrir fólk með skerta starfsgetu sem og vinnustaði. Fyrirtæki geta séð hag sinn í því að hafa fólk í hlutastörfum því þau hafa fengið að láta á það reyna með stuðningi Vinnumálastofnunar.