Hver meðlimur hópsins metur aðra nemendur og verður það allt nafnlaust. Mikilvægt er að nemendum sé kynnt þessi aðferð þannig að þeir geti lagt sanngjarnt mat á frammistöðu annarra og notað það á uppbyggilegan hátt. Aðeins mun kennarinn sjá þessar niðurstöður og taka þær saman í bland við hina námsmatsþættina.
 Tilgangurinn með jafningjamati er að nemendur hjálpi hver öðrum að gera betur og skiptist á skoðunum (Erna Ingibjörg Pálsdóttir, 2011, bls. 61).
 
Sjálfsmat
Með sjálfmati eiga nemendur að meta sjálfir nám sitt til þess að þeir geti skilið betur hvað þarf að gera til þess að ná árangri. Það getur hjálpað þeim að styrkjast í trúnni á eigin geta og færni. Í sjálfamatinu mun vera lagt áhersla á þrjár leiðir til að íhuga og meta vinnuna sem þeir lögðu í verkefni: að líta um öxl, að tengja við viðmið og að sanna sig. Nemendur fá að skrá niður hugsanir sínar um verkefnið og segir frá hvað þeir gerðu vel og hvað hefði mátt fara betur (Erna Ingibjörg Pálsdóttir, 2011, bls. 53). 

Oft eru nemendur neikvæðir gagnvart því að sjálfsmat sé notað til að gefa einkunn í lok námstíma þar sem þeir telja það tilgangslaust og að ekki sé tekið mark á þeirra einkunn. En með því að leggja áherslu á þátttöku nemenda við að setja sér markmið og að vera stöðugt að ígrunda það hvernig þeim miðar breytist matið í að vera dæmandi í að vera leiðbeinandi fyrir nemendur (Erna Ingibjörg Pálsdóttir, 2011, bls. 62).

Kennsluaðferð
Skoðunarferð (útlistunarkennsla)
Kennari bregður sér í hlutverk leiðsögumanns og farið er í stutta gönguferð í nærumhverfi skólans. Gengið er á útsýnisstað eða niður í fjöru í nærumhverfi skólans á degi þegar skyggni er gott en mikilvægt er að kennari sé búinn að undirbúa sig og hópinn vel áður en lagt er af stað. Þegar hópurinn kemur auga á fjöll þá miðlar kennari þekkingu sinni og reynir að kveikja áhuga nemenda (Ingvar Sigurgeirsson 2013, bls. 79-80) með vel völdum spurningum tengdum fjöllunum sem fyrir bregða.

Spurnaraðferð (umræðu- og spurnaraðferðir)
Kennari stýrir umræðu með hópnum með nokkrum lykilspurningum (Ingvar Sigurgeirsson, 2013, bls. 117). Umræður eru hafnar þegar fjöll sjást og spurningum varpað upp, t.d. „þekkiði einhver nöfn á fjöllunum sem við sjáum?“, „hefur einhver í hópnum gengið á eitthvert þessara fjalla?“, „hafið þið ferðast í nágrenni fjallanna?“ o.s.frv
En þannig notar hann tengingu við þeirra eigin reynslu sem kveikju og má nota sem upphaf samræðnanna.

Tenging við fræði
Með þessari kennsluaðferð erum við að vinna með þekkinguna, að nemendur öðlist þekkingu með því að  hlusta á, ræða eða með upplifun og reynslu í gegnum athafnir (aðalnámskrá grunnskóla, 2013, bls 39). Sem tengist þá fyrsta stigi í flokkunarkerfi Blooms á þekkingarsviðinu -  minni (e.remember) (Kennslumiðstöð Háskóli Íslands. e.d).

Tenging við fræði
Í þessari lotu erum við að vinna með skilninginn. Kennari miðlar þekkingu með fjölbreyttum leiðum sem verður til þess að nemandi geti rætt, flokkað og borið saman viðfangsefnin (aðalnámskrá grunnskóla, 2013, bls 39) Þarna erum við þá komnar á annað þrep flokkunarkefisins Blooms sem er skilningur (e.understand) (Kennslumiðstöð Háskóli Íslands. e.d).

Hóparnir eiga að vinna saman og byrja á því að finna fjallið sem þeim var úthlutað á kortinu.
Því næst á hver hópur að koma upp með 20 fjöll sem þeir þekkja og skrifa á lista, þeir þurfa því næst að staðsetja þau á kortinu og geta stuðst við góða kortabók sem staðsett er við þrívídda landakortið.
Þegar hópurinn er búinn þá skilar hann listanum til kennara sem fer með þeim yfir staðsetningarnar á fjöllunum á listanum.

Sjálfbærni  - kemur fram í göngutúrnum og fjallgöngunni og nemendur öðlast þá meiri virðingu fyrir náttúrunni með því að umgangast hana. Margt smátt gerir eitt stórt og þurfa nemendur að átta sig á því að þeir geta vel gert sitt þó svo að stóru breytingarnar eru ekki endilega að gerast (aðalnámskrá grunnskóla, 2013, bls 20).

Sköpun - kemur sterklega fram við vinnslu lokaverkefnisins sem eru myndræn plaköt fyrir kynningar um eitthvað tiltekið fjall. Þeir fá allskonar efnisvið til að gera plakötin sem flottust. Þegar nemendur fá tækifæri til þess að skapa eitthvað úr viðfangsefnum, þar sem þeir skilja merkingu og gildi, leiðir sú sköpunargleði til námsáhuga (aðalnámskrá grunnskóla 2013, bls.24).