སྲིད་པའི་འབྱོར་བ་ལ་ཁའི་ན་བུན། །

འདུས་པའི་སྙིང་གྲོགས་ཚོང་དུས་མགྲོན་པོ། །

མ་ངེས་སྐྱིད་སྡུག་མདང་གི་རྨི་ལམ། །

བསམ་ཞིང་{བཞིན་}བསམ་ན་སྙིང་བོ་མི་འདུག །

རྒྱུས་མེད་གཤིན་རྗེའི་ཕོ་ཉས་ཁྲིད་ནས། །

ཕྱི་མའི་འཕྲང་རིང་འགྲིམ་པའི་གྲོགས་ལ། །

སྐྱབས་ཀྱི་དམ་པ་རྩ་གསུམ་ལྷ་ཡིས། །

ཐུགས་རྗེ་ཅན་གྱི་སྐྱེལ་མ་མཛོད་ཅིག །

སྐྱེས་ནས་འཆི་བ་འཁོར་བའི་ཆོས་ཉིད། །

བསྒྱུར་དུ་མེད་པ་སྒྱུ་མའི་རང་མདངས། །

མི་བཟློག་གཤིན་རྗེ་རྒྱལ་བོའི་བཀའ་ཡིག །

ཉམས་ཆུང་གྲོགས་ཀྱི་སྟེང་དུ་སླེབས་སོང་། །

སྔོན་སྨོན་ལས་ཀྱི་ཆར་ཟིམ་བབས་ཚེ། །

ཡོད་ཡོད་འདྲ་བའི་དགུང་གི་འཇའ་ཚོན། །

དུང་སེམས་ཉི་མས་གསལ་དུ་སོང་ཚེ། །

མི་མཐོང་ནམ་མཁའི་དབྱིངས་སུ་ཡལ་སོང་། །

ན་གཞོན་ལང་ཚོའི་མེ་ཏོག་རྒྱས་དུས། །

ཡིད་ཀྱི་ཆུ་བོ་གཅིག་ཏུ་འདྲེས་པའི། །

འདྲིས་འདྲིས་ཆུང་གྲོགས་སེམས་ཀྱིས་འཚེར་ཡ། །

ད་ལྟ་རིགས་དྲུག་གང་དུ་ཡོད་ན། །

སྐྱིད་ཤོད་ལྷ་སའི་གྲོག་ཆུ་ཕྲ་མོ། །

ཞག་གསུམ་འཛོམས་པ་འགྲོགས་པའི་ཐ་མ། །

མི་རིང་འཕྲད་པའི་ཁ་ཆད་བྱས་པ། །

རྨི་ལམ་ངང་ནས་མཇལ་དུས་སླེབས་སོང་། །

རྒན་གཞོན་བར་མའི་སྐྱེ་བོ་མཐའ་དག །

ངེས་མེད་འཆི་བའི་སྣང་ཚུལ་མཐོང་ཡང་། །

ཆུང་སྐྱེས་གྲོགས་ཀྱིས་བོར་བའི་ཕྱོགས་ལ། །

ནང་གི་དུང་སེམས་ཆོད་ཐབས་མི་འདུག །

ཤི་རྗེས་འགྱོད་པ་བླུན་པོའི་ངང་ཚུལ། །

ལུས་སེམས་རྒུད་པའི་རྒྱུ་ལས་མེད་ཀྱང་། །

ཡུན་རིང་འདྲིས་པའི་སེམས་ཀྱི་བག་ཆགས། །

གོམས་པའི་ཤུགས་འདི་བཟློག་ཐབས་མི་འདུག །

ལུས་ཟུང་ཟད་ལ་ཀེང་རུས་གཟུགས་བརྙན། །

གསོན་དུ་རེ་བའི་ཁོ་ཐག་ཆད་དེ། །

འཆི་བའི་མིག་གིས་ཅེ་རེ་བལྟ་བའི། །

གཏམ་དེ་བདེན་ན་སྙིང་ལ་གཟན་པ། །

མ་བརྟགས་སེམས་ཀྱི་འཆར་ཚུལ་ཞིག་ལ། །

ད་དུང་དྲུང་ན་ཡོད་ཡོད་འདྲ་བ། །

དྲན་པའི་གཞུ་མོ་ནང་དུ་བཀུག་ཚེ། །

སྙིང་ཁོང་སྟོང་བའི་རྒྱུ་ལས་མི་འདུག །

བརྩེ་ཞིང་འགྲོགས་པའི་ཕྱི་ཐག་བསམས་ཏེ། །

མཆོག་གསུམ་བསླ་བ་མེད་པའི་ཞིང་དུ། །

དགེ་བའི་དངོས་པོ་ཅུང་ཟད་བསྒྲུབས་པ། །

ཕྱི་མའི་ཡུལ་དུ་གྲོགས་ལ་བསྲིངས་སོ། །