Stjórnendur vinnustofunnar leggja upp verkferli og gefa þátttakendum tækifæri til að deila hugmyndum og afurðum. Nýr vefur aðalnámskrár verður kynntur og sýnt hvaða gögn má nýta á honum til að styðja við skipulag náms og námsmat. Áhersla verður lögð á tengsl hæfniviðmiða, námsmarkmiða og matsviðmiða. Einnig verður sýnt hvernig hægt er að flétta lykilhæfni inn í kennsluáætlanir til að þjálfa vinnubrögð nemenda og gera leiðsagnarmat sýnilegra í daglegu starfi. Vonast er til að breiður hópur kennara sæki vinnustofuna svo hægt verði að taka samtal þvert á greinasviðin.

Lykilspurningar í vinnustofunni:

• Hvernig hjálpar aðalnámskrá mér að skipuleggja nám, kennslu og námsmat?

• Hvernig get ég nýtt stuðningsefni á vef aðalnámskrár til að einstaklingsmiða markmið náms og námsmat?

Afurð þátttakenda við lok vinnustofunnar:

• Einstaklingsmiðuðu námsáætlun um afmarkað viðfangsefni sem ákveðinn nemendahópur mun vinna að á komandi skólaári. Við gerð námsáætlunarinnar verður nýr vefur aðalnámskrár nýttur á mjög verklegan hátt.

Hvað þurfa þátttakendur að hafa með á vinnustofuna?

• Til þess að vinnustofan nýtist sem best er mikilvægt að þátttakendur hafi með sér tölvu.

Brynhildur hefur sérstakan áhuga á samræðu í skólastarfi og leiðbeinir kennurum gjarnan um slíka kennsluhætti. Nú starfar hún sem sérfræðingur í málefnum aðalnámskrár hjá Miðstöð menntunar og skólaþjónustu.