Zahra 🌷

نفسي أعمل حاجة مؤثرة في حياتي وف حياة اللي حواليا يفتكروني بيها.

نفسي يبقى معايا فلوس عشان أريح أهلي وأسعدهم وأعبرلهم عن امتناني وحبي ليهم وتقديري لمجهودهم.

نفسي أسس بيت وأسرة صغيرة وأولاد أربيهم تربية صالحة عشان يكون لي ولد صالح يدعو لي بعد ما أموت.

نفسي أزور سيدنا النبي وأعمل عمرة أبكي فيها بكاء السنين على ما رأيته وما قاسيته.

والحمدلله رب العالمين

أهلي مبسوطين وسعداء

أطيييير وأطلق العنان والحرية لروحي

أتعلم فروسية وركوب خيل

أجري

أقدر أعبر عن الحب اللي جوايا لكل الأشياء

أقدر أتعامل بعفويتي مش بتصنع

يكون عندي مزرعة كبيييرة وفيها بحيرة أقدر أروح لها لما أزهق

أروح البحر زي شرم الشيخ والغردقة

أتعلمم كل شيء عايزة أتعلمه

يجي وقت أقدر أعلم حد اللي أتعلمته

نفسيي في طفل أووووووووووي

يارب أعرف أخلي الطفل ده سوي وجميل ويكون والده هو كمان سوي وجميل

مكنتش فاكرة إني هكتب ده بس محتاجة راجل حنين مراعي ويحضنني مبقاش خايفة معاه وميحبطنيش عايزاه يساعدني أكون أحسن ويشجعني....عايزاه يستحملني ويتقبلني

عايزة أنول نصيب كبير من اسمي

عايزة عائلة سوية جميلة مترابطة

عايزة أبقى جميلة.

ان أزور بيت الله وأبكي على قدر ما في قلبي من مشاعر وغضب وحب، واشتياق، وخوف.

ان اعيش عيشة راضية بسيطة، لا اطمح ان اغير العالم، ف اعلم ان هذا غير واقعي، بل ان اكون مثل أثر الفراشة و لو في حياة من حولي.

اتمنى زي ما سامحت الناس والدنيا ربنا يسامحني على أي حاجة وميخليش لحد من عباده عندي أي مظلمة

اتمنى رضا تام عن كل جوانب حياتي حتى لو مفيش حاجة اتغيرت نفسي اتعلم التقبل وحب الذات

اتمنى قبل ما أموت التعافي من كل الأزمات الصحية اللي عندي واكون معافاة من غيرها طبعاً

اتمنى أمي تعيشلي العمر كله 💕

اتمنى اتجوز راجل ينفع عيلة ♥️

اتمنى عيال حلوة وزي الفل بيعبدوا ربنا

اتمنى اقدر اقوم بأدواري كلها في الحياة من دون تقصير

اتمنى احس اني محبوبة ومتشافة من شريك حياتي زي ما كنت بحلم

اتمنى اتعلم مفرطش في حقي ولا اهندل الناس طول الوقت - وتبقى حدودي أوضح

اتمنى الأمان كمان...

واكون حسن خاتمه عشان ادخل الجنة عشان انا مش حمل ثانيه واحده عذاب فى النار.

ونفسي اعيش فى بيت قدام النيل على شط النيل على طول

نفسي اجرب حضن بابا

نفسي اتصور صورة عائلية كبيرة مش ناقصها حد وتكون متاخدة على غفلة وكلنا نكون بنضحك فيها أو حتى بنكلم بعض

نفسي اروح مكان اخضر فيه صخور وشلالات كتيرة وانزل اعوم في الشلال واحس بالميا وهي بتلطش فيا (هعتبرها بتلعب معايا وانا كمان هلطش فيها لحد مانفسي يتقطع واقولها غلبتيني)

وهلبس فستاني الكاروهات وانزل date مع اكتر ولد عجبني وهرقص معاه وبعد مانخلص رقصتنا هنقعد نمشي في الشارع لحد الشروق واقوله اد ايه أنا بحب الشروق وأد ايه بشوف فيها الحياه وهديله بوكس فيه قصاقيصي ورسوماتي وجواباتي وحكاياتي وكل الحاجات العبيطة اللي فخورة بيها

هروح لناس معرفش لغتهم ولا يعرفو لغتي وهسلم عليهم بعيني وأضحك في وشهم

وهختم رحلتي اني اروح مكة افضل اصلي في الحرم لحد لما رجلي تقع

وبعدين هريح شوية واطلع اوزع على الناس برتقان وبلح برحي عشان بحبهم 🧡💛

نفسي انهي حياتي هناك والناس تصلي عليا هناك 💚

وكنت بفكر لو الموضوع أمنيات وفنتازيات فكنت هقول ( اني انتقم لكل الناس في الدنيا اللي اتظلمت واتقهرت وفقدت

واعاقب كل اللي ظلموهم واجيب لهم حقهم

واعلم كل الناس اللي معندهاش فرصة تتعلم والاعب كل اللي معرفش يلعب واطبطب على كل حد محدش قاله معلش من قبل )

وبعدين حسيت ان اللي فوق دة كمان فنتازيات فضميتهم على بعض 😅

نفسي اسافر برا مصر

نفسي اخف

نفسي شغلي يتعرف اكتر و يبقي ليا مكان اعرض فيه منتجاتي (مكرميه)

نفسي محسش بإحساس الفقد تاني

نفسي اسوق عربيه لوحدي

احج واعمل عمرة كتير

يبقى عندي بيت جميل واسع بجنينة يعيش فيه معايا القطط بتاعتي ويبقى عندي بيت تاني على البحر

نفسي كمان أسافر بلاد كتير

نفسي مشتغلش لفترة أنا احددها وأرجع تاني براحتي

نفسي يكون عندي رفيق للرحلة مش أي حد

وأخيراً نفسي اعمل كل ده وانا مرتاحه البال من غير تحديات صعبة

و هحاول اصلي اللي فاتتني

هحاول اكون احسن في اللي باقي من عمري

و هفهم القران اكتر و هركز في الأذكار اكتر

و هحاول ارجع لو في اي فلوس عليا

مش حاسة اني هكون عايزة اعمل حاجة في حياتي العملية

علي قد ما هكون عايزة اعمل لحياتي الحقيقة بجد

بسنت يوسف - مصر

وأخيراً هكون ممتنه لأي حد قرأ الماسدج بتاعتي ودعالي

-رقروقه-♡

أريد أن يختارنى الموت في الوقت الذي لو كان الأمر بيدى لكنت اخترته فيه.

أسماء :)

واكون بشتغل شغل حلال ويكون معايا فلوس

وان اشوف اخواتي في اعمل المراتب ومتجوزين زوجات صالحات ويكون عندهم اولاد صالحين قبل ما يكبروا في السن

وربنا يرزقني بزوج صالح هين ولين ولا يشقيني بصحبته

واولاد صالحين قبل ما اكبر في السن بردو

نفسي ولدي وولدتي ربنا يهديهم وميقطعوش في الصلاه

وربنا يرزقهم الجبنه بدون سابق حساب او عذاب

نفسي احب واتحب من الشخص الصح

نفسي اكون مرتاحه

نفسي اسيب حاجه كويسه تكون صدقه جاريه ليا ولكل حبايبي

نفسي ربنا يسامحي علي اي حاجه وحشه عملتها

نفسي احس بامان قربي من ربنا

نفسي اهلي يكونوا كويسين ويكون بنا ود وحب

نفسي اساعد كل الناس

نفسي في بيت اكون مرتاحه فيه

نفسي اروح الحج انا واهلي

نفسي يبقي شعري ناعم وطويل

نفسي فلسطين ترجع واي حد مسجون ربنا يهديه ويرده لاهله

نفسي يبقا عندي سلام نفسي

نفسي اتخرج بمتياز

لفسي يكون عندي اولاد صالحين وموثرين في المجتمع ويكونوا فخورين بيا وبوالدهم

نفسي احفظ القران واعلمه لولادي وللناس

نفسي ابعد عن اي حاجه حرام

نفسي يبقا معايا فلوس كتيرر ومعايا عربيه حلوه

واسيب اثر طيب في قلوب كل اللي اقابلهم

نفسي ربنا يتوفني في احب فعل اليه

نفسي ابقا خفيفه علي اي حد

نفسي علاقتي بوالدي وولدتي تكون كويسه وفيها بر