Kennslustund 1 (80 mín.)
INNLÖGN og MÁLUN
Byrjað er á að kynna impressjónismann og helstu listamenn.
Að því loknu er nemendum sagt að verkefni þeirra felist í að mála mynd af fjöllunum sem við sjáum út um gluggann (eða öðru mótífi sem hentar) og nota aðferðir impressjónistanna. Þau mála tvær myndir, eina í þessum tíma og aðra í tíma þegar birtuskilyrðin eru önnur (sem gerist oft á Íslandi). Þannig fá þau tvö dæmi um mismunandi áhrif birtunnar á viðfangsefnið.

• gott er að skissa landslagið lauslega með ljósri krít áður en byrjað er að mála

• impressjónistar skelltu yfirleitt litunum óblönduðum á strigann í skellum og dreifðu helst ekkert úr þeim eftir það

• hægt er að mála t.d. ljósbláan himinn með því að setja hvítan og bláan lit hlið við hlið beint á strigann í stað þess að blanda litunum fyrst saman á pallettunni

• hægt er að ná í nýjan lit í pensilinn án þess að liturinn á pallettunni blandist (dýfa penslinum í kantinn á málningunni en ekki í miðjuna)

• hægt er að nota andstöðuliti í skugga og sleppa því að nota svartan lit

• hentugast er að byrja á að mála bakgrunninn (himininn), síðan miðrýmið (fjöllin) og síðast forgrunninn (láglendið)

• ekki þurfi að mála nein smáatriði eins og hús eða slíkt, aðeins eigi að einbeita sér að litblæ náttúrunnar

Innlögnin og sýnikennslan gæti tekið drjúgan hluta og jafnvel alla kennslustundina. Meta þarf hvort nægur tími sé til að byrja að mála eða hvort nýta eigi restina af tímanum til að skissa gróflega með ljósri krít landslagið (mótífið) sem nemendur ætla að mála.