Dahil sa globalisasyon, mas binibigyang-halaga ang Ingles bilang wikang ginagamit sa internasyonal na komunikasyon, edukasyon, at trabaho. Itinuturing itong susi sa mas malawak na oportunidad, kaya’t mas napapaboran ito kaysa sa paggamit ng Filipino o ng iba pang wika. Sa kabilang banda, bahagi rin ng ating kultura ang pagbibigay-prestihiyo sa Ingles; madalas itong nakikita bilang simbolo ng katalinuhan, mataas na estado sa lipunan, at pagiging “sosyal.”

Kaya naman, ang wika ay hindi lamang kasangkapan ng komunikasyon kundi salamin din ng ating pagkakakilanlan at kultura bilang Pilipino. Sa pamamagitan ng wika, naipapahayag natin ang ating mga tradisyon, paniniwala, at pagpapahalaga na siyang bumubuo sa ating kultura. Ang paggamit ng Filipino, halimbawa, ay hindi lang simpleng pakikipag-usap kundi paraan ng pagpapanatili ng ating yaman ng kultura—mula sa kasabihan, awit, at kuwentong-bayan hanggang sa mga bagong anyo ng sining at panitikan. Kaya’t ang pagpapahalaga at paggamit ng ating sariling wika ay nagiging paraan din ng pagbibigay-halaga sa kulturang Pilipino at ng pagpapatibay sa ating pambansang identidad.